1Sa 28 | NdeIBE | STEP | Ngalezonsuku amaFilisti aqoqa amabutho awo ukuba alwe lo-Israyeli. U-Akhishi wathi kuDavida, “Kumele uzwisise ukuthi wena labantu bakho lizahamba lami empini.”

1 Samuel 28

USawuli lomthakathi wase-Endori

1 Ngalezonsuku amaFilisti aqoqa amabutho awo ukuba alwe lo-Israyeli. U-Akhishi wathi kuDavida, “Kumele uzwisise ukuthi wena labantu bakho lizahamba lami empini.”

2 UDavida wathi, “Lapho-ke uzazibonela okungenziwa yinceku yakho.” U-Akhishi wathi, “Kulungile, ngizakwenza ube ngumlindi wami impilo yakho yonke.”

3 Ngalesosikhathi uSamuyeli wayesewafa, njalo u-Israyeli wonke wayemlilele wamgcwaba emzini wakibo eRama. USawuli wayesewaxotsha zonke izanuse labemimoya elizweni.

4 AmaFilisti abuthana eza amisa izihonqo zawo eShunemi, lapho uSawuli wabutha ama-Israyeli wonke wamisa izihonqo eGilibhowa.

5 USawuli ebona ibutho lamaFilisti wesaba, inhliziyo yakhe yaba lokuthuthumela. 6 Wabuza uJehova, kodwa uJehova kamphendulanga ngamaphupho loba nge-Urimi kumbe ngabaphrofethi. 7 USawuli wasesithi kuzikhonzi zakhe, “Ngidingelani owesifazana oyisanuse ukuze ngiyebuza kuye.” Bona bathi, “Kulomunye e-Endori.”

8 Ngakho uSawuli waziguqula, wafaka ezinye izigqoko, kwathi ebusuku yena labantu ababili baya kulowomfazi. Wathi kuye, “Ngibuzela umoya, njalo ungilethele lowo engizamutsho.”

9 Kodwa owesifazana wathi kuye, “Impela uyakwazi ukuthi uSawuli wenzeni. Useziqedile izanuse labemimoya elizweni. Kungani uthiya impilo yami ngomjibila ukuba ngibulawe na?”

10 USawuli wafunga kuye ngoJehova wathi, “Ngeqiniso elinjengoba uJehova ekhona, kawuyikujeziselwa lokhu.”

11 Owesifazana lowo wasesithi, “Ngikuvusele bani na?” Yena wathi, “Ngilethela uSamuyeli.”

12 Kwathi owesifazana lowo ebona uSamuyeli, wakhala ngelizwi eliphezulu wasesithi kuSawuli, “Kungani ungikhohlisile na? Wena unguSawuli.”

13 Inkosi yasisithi, “Ungesabi. Kuyini okubonayo?” Owesifazana wathi, “Ngibona umoya ophuma phansi.”

14 USawuli wathi, “Ukhangeleka njani?” Owesifazana wathi, “Kuphuma ixhegu eligqoke ingubo.” Lapho-ke uSawuli wakwazi ukuthi kwakunguSamuyeli, wakhothama wasesithi mbo phansi ngobuso.

15 USamuyeli wasesithi kuSawuli, “Ungikhathazelani ngokungivusa na?” USawuli wathi, “Mina ngiphakathi kohlupho olukhulu. AmaFilisti alwa lami, njalo uNkulunkulu usengifulathele. Kasangiphenduli, ngabaphrofethi loba ngamaphupho. Ngakho ngibize wena ukuba ungitshele ukuthi ngenzeni.”

16 USamuyeli wathi, “Ungibizelani, njengoba uJehova esekufulathele njalo esebe yisitha sakho na? 17 UJehova usekwenzile lokhu akutsho ngaphambili ngami. UJehova usewuhluthunile umbuso ezandleni zakho wawunika omunye wabomakhelwane bakho – uDavida. 18 Ngenxa yokuthi uJehova kawumlalelanga kumbe wafeza ulaka lwakhe olwesabekayo kuma-Ameleki, uJehova wenze lokhu kuwe lamhla. 19 UJehova uzanikela u-Israyeli kanye lawe kumaFilisti, njalo kusasa wena lamadodana akho lizakuba lami. UJehova uzanikela lebutho lako-Israyeli kumaFilisti.”

20 Khonokho nje uSawuli wawela phansi wathi daca emhlabathini, esegcwele ukwesaba ngenxa yamazwi kaSamuyeli. Wayengaselamandla, ngoba wayengadlanga lutho ilanga lonke mhlalokho lobusuku bonke.

21 Kwathi owesifazana esesondele kuSawuli wabona ukuthi wayethuthumele kakhulu, wathi kuye, “Khangela, incekukazi yakho ikulalele. Ngibeke ukuphila kwami engozini ngenza lokho othe ngikwenze. 22 Khathesi-ke ake ulalele incekukazi yakho uvume ukuba ngikuphe ukudla ukuze udle ube lamandla uzihambele.”

23 Yena wala wathi, “Kangiyikudla.” Kodwa abantu bakhe baphathisana lowesifazana ukumncenga, waze wabalalela. Wavuka phansi wahlala esihlalweni.

24 Owesifazana wayelethole elinonisiweyo endlini, alihlaba khonokho nje. Wathatha ifulawa, wayivuba wenza isinkwa esingelamvubelo.

25 Wasibeka phambi kukaSawuli labantu bakhe, badla. Ngalobobusuku bavuka bahamba.